ZEREN ZAI taldea 2004. urte bukaera aldean sortu zen, taldekide batzuk elkarrekin arlo desberdinetan aritu ondoren, elkarrekin pop-rock proiektu berri bat osatzeko asmoz. Guztiak musikaren alor desberdinetan arituak dira aurretik, musika klasikotik rock gogorreraino.

2005eko abenduan bere lehen lana plazaratu zuten "Gure Uhartea" izenburupean, bertan 7 kantu biltzen direlarik. Zuzeneko grabaketa izan zen, taldearen soinuak plazaratzeko lehen pausoa.

XV. Donostia Hiria Pop-Rock lehiaketako final erdietan izan ziren 2006ko udan. Horrez gain, hainbat kontzertu eskaini dituzte azken urteotan Euskal Herri eta Kataluinan zehar, Donostiako FNACen, Jalgi kafe-antzokian, Xpression Zirkuituko hainbat aretoetan, Irungo Landetxa aretoan, Olentzo aretoan, Bartzelonako Euskal Etxean, hainbat herritako jaietatik igaroz, besteak beste.

Taldean erabilitako instrumentuak kitarra elektrikoa, baxua, teklatua, bateria, eta ahotsa dira, nahiz eta zenbait kantutan kitarra akustikoa eta tronpeta ere erabili. Zeren Zai-ren definizio-estiloa pop-rocka da, kantu melodikoetatik rockeroetarako ibilbidean hitzei eta konponketei garrantzi berezia emanez.

2008an Zeren Zai-ren bigarren lana plazaratuko da, negu bukaera aldean. Bertan, gaur egun taldean diharduten musikariek parte hartu dute: Ion Izaga (kitarra elektrikoa), Gabi Hernandez (baxua), Javier Alberdi (bateria), Iraitz Igartza (teklatua eta gitarra) eta Julen Arzelus (ahotsa).